اسلام آباد۔26اگست(اے پی پی) وزیرِ اعظم محمد شہباز شریف قلات اچ دہشتگرد حملے دی ودھیکی مذمت کریندے واقعے دی وختی تحقیقات تے ذمہ واراں دی نشاندہی کرتے قرار واقعی سزا ݙیواوݨ دی ہدایت کیتی اے ۔ وزیراعظم دفتر دے میڈیا ونگ توں جاری بیان موجب وزیرِاعظم دہشتگرداں دی فائرنگ دے نتیجے اچ پولیس و لیویز اہلکاراں تے شہریاں دی شہادت تے ݙکھ تے افسوس کیتے ، انھاں شہدا کوں خراجِ عقیدت پیش کریندے انھاں دے اُچے ِدرجات اتے گھر آلیں سانڳے صبر دی دعا منڳی ۔ وزیراعظم ہدایت کیتی جو زخمیاں کوں بہترین طبی سہولتاں ݙتیاں ونڄن۔ دہشتگردی دے عفریت دے ملک توں منڈھوں مکݨ تئیں ایندے خلاف جنگ جاری رکھیسوں ، امن دے قیام سانڳے پولیس و سکیورٹی اداریں دیاں لازوال قربانیاں قوم کݙاہیں نی بھلا سڳدی ،ملک دشمن عناصر ایجھیاں بزدلانہ کارروائیاں توں پاکستانی قوم دے حوصلے جھکے نی کر سڳدے ۔ وزیرِاعظم آکھیے دہشت گرداں دے ملک اچ انتشار کھنڈاوݨ دے ناپاک ارادے کݙاہیں کامیاب نہ تھیوݨ ݙیسوں ،دہشتگردی دے خلاف ایں جنگ اچ پوری قوم سکیورٹی فورسز دے رلے کھڑی اے
