اسلام آباد۔28دسمبر(اے پی پی)وفاقی وزیر غذائی تحفظ و تحقیق چوہدری طارق بشیر چیمہ آکھیے جو زراعت ملکی ترقی اچ ریڑھ دی ہݙی دی حیثیت رکھیندی اے ، وزیراعظم کسان پیکیج اچ خصوصی دلچسپی گھندے ہوئیں ایندی منظوری ݙے ݙتی اے جیں کوں او خود مانیٹر کریندے پئن ،وزیراعظم زرعی قرضیں اچ ودھارا کیتے ،بلوچستان اتے سندھ اچ اڄوکے سیلاب پاروں فصلاں تباہ تھیاں۔ وفاقی وزیرطارق بشیر چیمہ ٻدھ کوں اتھاں پریس کانفرنس کریندے ہوئیں آکھیے ملک کوں اوکھ توں کڈھݨ کیتے کساناں دا کردار اہم اے،زراعت ملکی ترقی چ ریڑھ دی ہݙی دی حیثیت رکھیندی اے ،ناقص پالیسیاں پاروں اڄ اساکوں زرعی مصنوعات درآمد کرݨیاں پوندن ۔ انہاں آکھیے ملک دے 21ملین ایکڑ رقبہ تے کݨک رادھی ڳئی اے جیڑھی جو کل کاشت کیتے ڳئے رقبے دا91فیصد اے اتے اے حوصلہ افزا ڳالھ اے جو کسان انہاں اوکھے حالات اچ کݨک رادھی اے باقی رقبے تے وی کجھ ݙینھ اچ کݨک دی رہوائی مکمل تھی ویسی انشااللہ امید اے کݨک ٻاہرلے ملکاں توں نہ منگواوݨی پوسی ۔ انہاں آکھیے جیڑھے بینک کسان پیکیج کوں ڈیل کریندے پئن انہاں دی کارکردگی ٻہوں حد تئیں بہتر اے ، سیلاب توں متاثرہ علاقیں ا وی جیڑھے قرضے ݙتے ڳئن انہاں تے مارک اپ ختم کیتا ویندا پئے ۔ انہاں قرضیں دا 50فیصد مارک اپ وفاقی حکومت تے 50فیصد بینک برداشت کریسن ، ایں سلسلے اچ سٹیٹ بینک نوٹیفیکیشن جاری کرݙتے ۔
