گوادر۔5جولائی (اے پی پی):چیئرمین سی پیک اتھارٹی لیفٹیننٹ جنرل (ر) عاصم سلیم باجوہ آکھیے جو سی پیک تے تکھا کم اڳوں ودھدا پئے ، ایندے ثمرات عام لوکاں تئیں پڄسن ، گوادر پورٹ مکمل آپریشنل تھی چکی اے ، 60 ایکڑ رقبہ تے فری زون فیز ۔1 مکمل تھی ڳئے، 2200 ایکڑ تے فیز ۔2منصوبے دے سنگ بنیاد توں ارباں ڈالر دی سرمایہ کاری دا نواں سلسلہ شروع تھیسی، گوادر اچ جدید ہسپتال، ایئرپورٹ اتے ووکیشنل انسٹیٹیوٹ دی تعمیر وی جاری اے، جنوبی بلوچستان پیکج توں علاقے اچ پاݨی ،بجلی ، سڑکاں تے روزگار دے مسئلے حل تھیسن ، اے ڳال انہاں سنوار کوں ترقیاتی منصوبیں دی افتتاحی تقریب توں خطاب کریندے ہوئیں آکھی اے ۔ انہاں آکھیے جو اڄ دا ݙینھ تاریخی اے ، گوادر پورٹ مکمل آپریشنل تھی ڳئی اے ۔40 کمپنیاں اتھاں آپݨیان سرگرمیاں شروع کر چکئن۔ انہاں منصوبیں دے رستے اچ پراݨیاں رکاوٹاں تے مسئلے موجودہ حکومت دیاں کوششاں نال حل تھئن ۔ 13 سال بعد گوادر پورٹ فری زون پالیسی بݨائی ڳئی۔ ایل پی جی اتے ایل این جی لائسنسز دا اجرا تھیا۔ ایران دے نال سرحدی انتظام دے معاملے تے پیشرفت تھئی تے ایسٹ بے ایکسپریس وے دی تعمیر شروع تھئی ، انہاں آکھیے جو گوادر پورٹ دے نال نال گوادر شہر اچ وی ترقی دا سفر جاری اے ۔ماسٹر پلان دی منظوری ݙتی ڳئی اے ۔ سی پیک دے تحت گوادر اچ 100 بستریں تے مشتمل جدید ہسپتال، بین الاقوامی ایئرپورٹ اتے ووکیشنل انسٹیٹیوٹ بݨایا ویندا پئے ۔ جنوبی بلوچستان اچ ماضی اچ نظر اندز کیتے ونجݨ دا احساس پاتا ویندے ۔ پاݨی ، بجلی ، سڑکاں تے روزگار ایں علاقے دے مسئلے ہن جیڑھے جو جنوبی بلوچستان پیکج نال حل تھیسن اتھاں ترقی دا ھک نواں دور شروع تھیسی ۔ انہاں آکھیے جو چیئرمین سینیٹ صادق سنجرانی، وزیر خارجہ شاہ محمود قریشی، وفاقی وزیر منصوبہ بندی اسد قیصر اتے ٻئے صوبائی و وفاقی وزرا سی پیک دے منصوبیں کوں اڳوں ودھاوݨ اچ چنڳاں کردار ادا کریندے پئے ،سی پیک پاکستان دے حاسداں اتے دشمناں دے پروپیگنڈے دے نشانے تے ہے ۔ سی پیک دے خلاف پراپیگنڈا ناکام بݨاوݨ تے ایں پراپیگنڈے دے اثرات مکاوݨ اچ وفاقی وزیر اطلاعات و نشریات فواد حسین چوہدری خود تے آپݨے اداریں دے ذریعے حل کراوݨ اچ اہم کردار ادا کریندے پئن ۔ انہاں آکھیے جو سکیورٹی فورسز دی محنت اتے قربانیاں دے بغیر انہاں منصوبیں تے کم اڳوں ودھاوݨ اوکھا ہوندا انہاں دیاں قربانیاں وی قابل تحسین ہن۔ چین دے سفیر نونگ رونگ وی سی پیک منصوبیں کوں ودھاوݨ اچ اہم کردار اد کریندے پئن ۔وزیراعظم عمران خان دی سربراہی اچ سی پیک کوں توسیع ݙتی ویندی پئی اے اتے وزیراعظم دے شکر گزار ہیسے جو او خود خود سی پیک دی سرپرستی کریندے پئن ۔
