اسلام آباد۔4نومبر (اے پی پی) قائم مقام صدر سید یوسف رضا گیلانی ریزیلینس اتے پائیدار مستقبل کیتے 2030 تئیں پائیدار ترقی دے اہداف کوں پورا کرݨ کیتے کوششاں، وݙے پیمانے تے آگاہی اتے اتے اختراعی نقطہ نظر دی لوڑھ تے زور ݙیندیں ہوئیں آکھیا جو ملک دی ترقی تریمتیں کوں تعلیم، روزگار اتے انہاں کوں بااختیار ٻݨاوݨ دی شرط نال جڑی اے۔ قائم مقام صدر اے ڳالھیں سنوار کوں پائیدار ترقیاتی پالیسی انسٹی ٹیوٹ (ایس ڈی پی آئی) ولوں 27 ویں پائیدار ترقی دی کانفرنس دے افتتاحی اجلاس توں خطاب کریندیں ہوئیں آکھی۔ انہاں آکھیا جو جدید طریقیاں نال مصنوعی ذہانت اتے بلاک چین اچ پیشرفت ودھا تے سماجی تحفط اتے جامع ترقی کیتی ونڄ سڳدی اے۔ انہاں کابینہ دے ارکان، ماہرین تعلیم، ماحولیاتی ماہرین، تھنک ٹینکس اتے محققین کوں ݙسیا جو پائیدار طریقیاں دے ودھارے کیتے ذمہ وار شہری ٻݨݨ اتے ماحولیاتی آگاہی دے کلچر کوں ودھاوݨ دی لوڑھ اے۔ انہاں سسٹین ایبلٹی انویسٹمنٹ ایکسپو 2024 دے ݙوجھے ایڈیشن دی تعریف کیتی۔ قائم مقام صدر آکھیا جو کانفرنس دا تھیم جدت اتے موافقت دے علاوہ کمزوریاں کوں طاقت اچ بدلݨ دی اہمیت دی یاد دہانی اے۔ انہاں آکھیا جو موسمیاتی تبدیلی پاروں پاکستان پنجواں ساریاں توں کمزور ملک ہووݨ پاروں موسمیاتی تبدیلیاں دے اثرات اچ اے۔ سید یوسف رضا آکھیا جو ملک موسمیاتی نظم و نسق اتے پائیدار ترقی آلے پاسے قابل ستائش پیش رفت کیتی اے۔ قومی موسمیاتی اتے پائیدار ترقی دی پالیسی ریزیلینس، تخفیف، غربت دے خاتمے، سماجی مساوات، تریمتیں کوں بااختیار ٻݨاوݨ، زراعت، آبی وسائل اتے توانائی دی کارکردگی نال نبڑݨ کیتے ہک جامع حکمت عملی دا خاکہ پیش کیتے۔ قائم مقام صدر آکھیا جووزارت منصوبہ بندی دا فائیو ایز فریم ورک برآمدات، ای گورننس، ماحولیات اتے موسمیاتی تبدیلی، توانائی اتے انفراسٹرکچر دے نال نال مساوات اتے بااختیار ٻݨاوݨ بارے پاکستان دی مختصر توں درمیانی مدت دی حکمت عملی دی وضاحت کریندے۔ انہاں آکھیا جو بے ںظیر انکم سپورٹ پروگرام لکھاں کمزور ٹبراں کوں مالی امداد ݙتی اے اتے غربت اچ ڳھٹکی کیتے معاشی اصلاحات جاری ہن۔ انہاں آکھیا جو پاکستان دی پارلیمنٹ کوں سرلر انرجی تے کر ݙتا ڳئے۔ ایندے علاوہ پارلیمنٹ دے ݙوہیں ایواناں دی ماحولیاتی تبدیلیاں تے قائمہ کمیٹیاں ٻݨا ݙتی ڳئن۔ انہاں آکھیا جو ملک دی ترقی تریمتیں کوں تعلیم، روزگار اتے قیادت ݙے تے انہاں کوں بااختیار ٻݨاوݨ دی شرط نال جڑی اے کیونجو صنفی مساوات نہ صرف اخلاقی لوڑھ اے بلکہ پائیدار ترقی دا ہک اہم محرک اے۔
.jpg)
