اسلام آباد۔ 7 مئی (اے پی پی)صدر مملکت آصف علی زرداری بھارت ولوں شہری آبادی کوں نشانہ بݨا تے پاکستان دے خلاف جارحیت دی مذمت کریندے آکھیے جو پاکستان بھارتی جارحیت دا تکڑا ولدا ݙیسی۔ انہاں آکھیا جو بھارتی اشتعال انگیزی دا مقابلہ وݙی طاقت اتے پاکستان دی خودمختاری اتے علاقائی سالمیت دے تحفظ دے غیر متزلزل عزم نال کیتا ویسی، شہری علاقیاں کوں نشانہ بݨاوݨ اتے بلا اشتعال بھارتی حملے بین الاقوامی قانون، اقوام متحدہ دے چارٹر اتے پاکستان دی خودمختاری دی کھلی خلاف ورزی ہین۔ انہاں آکھیا جو پوری پاکستانی قوم آپݨیاں بہادر مسلح افواج دے پچھوں کھڑن، بھارت دے بزدلانہ اقدامات ہک فاشسٹ حکومت دا مکروہ چہرہ ݙکھیندن۔ صدر مملکت آکھیا جو بھارتی حکومت آپݨے سیاسی ایجنڈے کوں اڳو تے ودھاوݨ کیتے علاقائی امن و سلامتی داء تے لاوݨ کیتے تیار اے۔ صدر آصف علی زرداری آکھیا جو پاکستان دیاں مسلح افواج مادر وطن دے ہک ہک انچ دے دفاع کیتے پوری طرح تیار اتے اہل ہن۔
