راولپنڈی۔ 13 ستمبر (اے پی پی) 10 توں 13 ستمبر دے دوران خیبر پختونخواہ اچ ہک وکھرے آپریشن اچ انڈین پراکسی فتنہ الخوارج نال تعلق رکھݨ آلے 35 خوارج کوں جہنم واصل کیتا ڳئے ۔ مسلح افواج دے شعبہ تعلقات عامہ (آئی ایس پی آر) توں جاری پریس ریلیز موجب خوارج دی موجودگی دی اطلاع تے سکیورٹی فورسز ضلع باجوڑ اچ انٹیلی جنس دی بنیاد تے آپریشن کیتا۔ آپریشن دے دوران پاک فوج دے دستیں خوارج دے مقام تے موثر طریقہ نال کارروائی کیتی تے شدید فائرنگ دے تبادلے دے بعد 22 بھارتی سپانسرڈ خوارج کوں جہنم واصل کر ݙتا۔ایویں جنوبی وزیرستان دے ضلع اچ تھیوݨ آلے ہک ٻئے مقابلے اچ سکیورٹی فورسز 13 خوارج کوں ہلاک کر ݙتا، تاں جو شدید فائرنگ دے تبادلے دوران دھرتی دے 12 بہادر پُتراں بہادری نال لڑدے اپݨی قربانی پیش کیتی تے شہادت کوں ڳل لاتا۔ ہندوستانی سرپرستی اچ ہلاک تھیوݨ آلے خوارج، جیڑھے انہاں علاقیں اچ دہشت گردی دیاں ٻہوں کارروائیاں اچ سرگرم رہیے، انھاں توں اسلحہ تے گولہ بارود وی برآمد تھئے۔انٹیلی جنس رپورٹس واضح طور تے انہاں گھناؤنے کماں اچ افغان شہریاں دے ملوث تھیوݨ دی تصدیق کیتی اے۔ ایں دے علاوہ فتنہ الخوارج دے دہشت گرداں ولوں پاکستان دے خلاف افغان سر زمین دا استعمال وی تشویش دا باعث بݨیا ہویا اے۔ آئی ایس پی آر آکھیا جو پاکستان توقع کریندے جو افغان حکومت اپݨیاں ذمہ واریاں پوریاں کریسی تے ساݙے خلاف دہشت گردی دیاں سرگرمیاں کیتے اپݨی سر زمین دا استعمال روکیسی۔ علاقے اچ پاتے ونجݨ آلے کہیں وی بھارتی سپانسرڈ خارجی کوں مکاوݨ سانڳے کلین اپ دیاں کارروائیاں کیتیاں ویندیاں پئن ، پاکستان دی سکیورٹی فورسز ملک توں بھارتی سپانسرڈ دہشت گردی دی لعنت کوں مکاوݨ سانڳے پرعزم تھی تے کم کریندیاں پئن تے ساݙے بہادر جواناں دیاں ایجھیاں قربانیاں ساݙے عزم کوں ٻیاں تکڑا کریندن۔
.jpg)
.jpg)
